மராட்டிய மாநில ஆளுநர் மாளிகையில் ஆங்கிலேயர் காலத்தில் கட்டப்பட்ட பாதாள அறை கண்டுபிடிக்கப்பட்டு உள்ளது.

மராட்டிய மாநில ஆளுநர் மாளிகை மும்பை மலபார் ஹில் பகுதியில் உள்ளது. இங்கு ஆங்கிலேயர் காலத்தில் பயன்படுத்தப்பட்ட பாதாள அறை இருப்பதாக மூத்த குடிமக்கள் சிலர் ஆளுநர் வித்யாசாகர் ராவிடம் தெரிவித்து இருந்தனர். இதனை கண்டுபிடிக்குமாறு அதிகாரிகளுக்கு ஆளுநர் உத்தரவிட்டார்.

இந்தநிலையில் கடந்த 12–ந் திகதி, ஆளுநர் மாளிகையின் கிழக்குப்புறம் இருந்த சுவரை பொதுப்பணித்துறை ஊழியர்கள் இடித்து அகற்றினர்.

அப்போது, அங்கு 20 அடி உயர கதவு இருந்தது. அதை திறந்து உள்ளே சென்றபோது சரிவு பாதை அமைக்கப்பட்டு அது பாதாளத்துக்குள் சென்றது.

அதற்குள் இறங்கி பார்த்தபோது, 150 மீற்றர் நீளத்தில் பாதை தென்பட்டது. பாதாளத்தில் இருந்த அந்த பாதையின் இரு புறங்களிலும் சிறியதும், பெரியதுமான 13 அறைகள் இருந்தன. ஆயுதங்கள், தோட்டாக்கள், ஆயுதங்கள் பழுதுபார்க்கும் அறை என ஒவ்வொன்றிலும் பெயர் பலகை இருந்தது.

ஒட்டுமொத்த இந்த பாதாள அறை 5 ஆயிரம் சதுரஅடிக்கு மேல் பரப்பளவை கொண்டதாக இருந்தது. மேலும் இது பாதாள சாக்கடை வசதியுடன், சுத்தமான காற்றுடன் கூடிய சூரிய வெளிச்சம் பிரவேசிப்பதற்கான வசதியும் செய்யப்பட்டு இருக்கிறது.

ஆளுநர் வித்யாசாகர் ராவும், முதல்வர் தேவேந்திர பட்னாவிசும் பாதாள அறையை நேரில் பார்வையிட்டனர்.

இந்த பாதாள அறை ஆங்கிலேயர் ஆட்சிக்காலத்தில் 1869– 1875–ம் ஆண்டுகளுக்கு இடையே கட்டப்பட்டு இருக்கலாம் என கருதப்படுகிறது. இதனை போருக்காக பதுங்கு குழியாக பயன்படுத்தி இருக்கலாம் எனவும் தெரிகிறது. நாடு சுதந்திரம் பெறும் தருவாயில், அதனை சுவர் அமைத்து மூடி இருக்கலாம் என்று தெரிகிறது.

பாதாள அறையை பேணி பாதுகாக்குமாறு அதிகாரிகளுக்கு ஆளுநர் உத்தரவிட்டு உள்ளார்.

You may also Like